𝐌𝐚𝐝𝐚𝐱𝐰𝐞𝐲𝐧𝐞 𝐤𝐮-𝐱𝐢𝐠𝐞𝐞𝐧𝐤𝐚 𝐉𝐒𝐋 𝐚𝐲𝐚𝐚 𝐂𝐞𝐞𝐫𝐢𝐠𝐚𝐚𝐛𝐨 𝐤𝐚𝐠𝐚 𝐪𝐚𝐲𝐛-𝐠𝐚𝐥𝐚𝐲 𝐐𝐚𝐫𝐚𝐦𝐚𝐲𝐧𝐭𝐚 𝐂𝐢𝐢𝐝𝐚𝐦𝐚𝐝𝐢𝐢 𝐌𝐚𝐝𝐝𝐚𝐧𝐢𝐠𝐚 𝐚𝐡𝐚𝐚 𝐞𝐞 𝐮𝐠𝐮 𝐝𝐚𝐦𝐛𝐞𝐞𝐲𝐞𝐲 𝐆𝐨𝐛𝐨𝐥𝐤𝐚 𝐒𝐚𝐧𝐚𝐚𝐠
Madaxweyne Kuxigeenka Somaliland Mudane Maxamed Cali Aw Cabdi iyo weftigii u hoghaaminayey ayaa maanta ka qayb-galay Qaramaynta Ciidankii Maddaniga ahaa iyo gadiidkoodii dagaalka ee ugu dambeeyey Gobolka Sanaag.
Munaasbaddan lagu Qarameynayey Ciidanka Maddaniga ah ayaa ka qabsoontay Madaxtooyada Ceerigaabo, taas oo ahayd mid ka duwan munasabaddii hore ee Qaramaynta Ciidanka Maddaniga, maadaama ay ahayd tii ugu dambaysay.
Madaxweyne Ku-xigeenka JSL Mudane Maxamed Cali Aw Cabdi ayaa halkaasi ka jeediyey khudbad dhinacyo badan taabanaysa taasi oo uu kaga war-bixiyey qorshaha ballaadhan ee Qaramaynta Ciidanka Maddaniga waxana uu yidhi:
“Waxa maanta halkaasi inoogu soo gebogaboobay Qaramayntii Ciidamada Maddaniga ah ee Gobolka Sanaag. Horay waxa inoogu soo dhammaaday Saraar iyo Sool, Togdheerna iyadna meel fiican bay maraysaa.”
Geesta Kale Madaxweyne ku-xigeenka JSL Mudane Maxamed Cali Aw Cabdi ayaa sheegay in aanu Madaxweyne ku-xigeenka u ahayn cid gaar ah ama Gobol gaar ah balse uu yahay Madaxweyne ku-xigeenka ummadda JSL oo dhan, waxana uu yidhi:
“Dadka ayaa ku celceliyey in aan Ceerigaabo iyo Gobolka Sanaag aan ku soo noqnoqday taasina waxa aan ka leeyahay Ceerigaabo waan jecelahay mana ihi Madaxweyne ku-xigeen reer Awdal oo keliya ee waxa aan ahay Madaxweyne ku-xigeenkii Somaliland oo dhan.”
Ugu Dambeyntii Madaxweyneku-xigeenka JSL ayaa ka hadlay khayraadka Gobolka Sanaag, waxana uu sheegay in laga faa’iidaysan doono dhawaan, waxana uu yidhi :
” Sanaag waa Gobol ay ka buuxaan khayraad kala duwan oo ayna haysan aduunka kale! Waxa aynu ku dedaalaynaa sidii looga faa’iidaysan lahaa khayraadkaasi.”
