Dawladda Muqdisho oo Anfariir Siyaasadeed ka Qaaday Aqoonsiga Somaliland ee ka Socda Maraykanka
Warbaahin caalami ah ayaa werisay in maamulka dawladda taagta daran ee Soomaaliya ay anfariir siyaasaddeed ka qaadeen dhaqdhaqaaqyo ka socda Maraykanka oo la xidhiidha in dawladda Madaxweyne Donald Trump ay danaynayso inay aqoonsato Jamhuuriyadda Somaliland.
Warbixin ay baahisay jariidada The Africa Report, ayaa lagu sheegay in maamulka Muqdisho ay sas ka arradan diblomaasiyadda ay ka qaadeen aqoonsiga lagu wado Maraykanku inay ku ictiraafaan madaxbannaanida Jamhuuriyadda Somaliland.
Warbixintan oo Wakaaladda wararka Somaliland ee SOLNA soo turjuntay ayaa lagu sheegay in Madaxweyne Donald Trump iyo maamulka Soomaaliya aanu ka dhexayn xidhiidh wanaagsani xilligan.
Warku wuxuu intaas ku daray in Dedaallada aqoonsi raadinta Jamhuuriyadda Somaliland ay wadaan siyaasiyiin iyo xildhibaanno ka tirsan xisbiga Jamhuuriga ee uu Trump hoggaamiyo, kuwaasi oo sheegay in Somaliland ay tahay waddanka keliya ay ka jirto dimuqraadiyad mug lihi gobolka Heeska Aftika, isla markaana ay tahay dalka keliya ee hirgalin karta danaha Washington ee gobolkaas qalalaasuhu ka taagan yahay, maadaama ay nabad tahay, goobta ay ku taallaana ay muhiim tahay.
Xukuumadda Somaliland ayaa sheegtay in ay ka rajo qabto in Washington ay u aqoonsato Somaliland dal madaxbannaan, iyada oo Wasiirka Arrimaha Dibadda, Cabdiraxmaan Daahir Aadan, uu Maraykanka u tagay si uu u dardar-geliyo hawlaha aqoonsi raadinta.
