Xisbullah oo qiratay in duqayntii Beirut lagu dilay mid ka mid ah saraakiisheeda
Xisbullah ayaa dib ka xaqiijisay in mid ka mid ah saraakiisheeda lagu dilay duqayntii ay Israel Talaadadii ka gaysatay koonfurta Magaalada Beirut.
Xisbullah ayaa waxay sheegtay in Hassan Bdeir iyo wiil uu dhalay ay ku dhinteen duqaynta lala beegsaday dhismaha ku yaala koonfurta Beirut.
Wasaaradda Caafimaadka Lubnaan ayaa sheegtay in afar qof oo midi ay haweeney tahay ay ku naf waayeen duqayntaasi, toddobo kalena ay ku dhaawacmeen.
Madaxweynaha Lubnaan, Joseph Aoun ayaa si adag u cambaareeyay duqayntaasi, isagoona ku sheegay mid calaamad u ah cadowtinimada ay Israel u qabto dadka reer Lubnaan.
“Ku adkeysiga Israel ee ah inay sii waddo gardarradeeda waxay nooga baahan tahay inaan dadaal dheeri ah samayno, si aan ula hadalno saaxiibada Lubnaan ee adduunka oo dhan, si na loogu taageero xaqayaga madaxbannaanida buuxda ee dhulkeenna.”
Raysal Wasaare Nawaf Salam ayaa sidoo kale cambaareeyay weerarka.
“Weerarka lagu hayo xaafadaha koonfureed waa xadgudub bareer ah oo ka dhan ah qaraarka Qaramada Midoobey ee tirsigiisu yahay 1701, kaas oo xaqiijinaya madaxbannaanida Lubnaan.” Ayuu yiri Nawaf Salam, isaga oo tixraacaya qaraarkii Golaha Ammaanka ee Qaramada Midoobey ee soo afjaray dagaalkii sanadkii 2006 dhex maray Xisbullah iyo Israel.
Ibrahim Moussawi oo ka mid ah Xildhibaanada Xisbullah ku metela Baarlamaanka Lubnaan ayaa dowladda dalkaasi ku booriyay inay u dhaqaaqdo heerka ugu sarreya ee diblomaasiyadda, si xal loogu helo gardarrada Israel.
“Weerarka Israel wuxuu u dhigmaa gardarro weyn oo ba’an, kaas oo xaaladda gaarsiinaya, si ka duwan kuwii hore.” Ayuu yiri Ibrahim Moussawi oo Warbaahinta la hadlay, ka dib markii uu booqday dhismaha la duqeeyay ee afarta qof ay ku dhinteen.
Wasiirka Arrimaha Dibadda Israel, Gideon Sa’ar oo ka falcelinayay dilka Hassan Bdeir ayaa sheegay in ninkaasi uu ahaa khatar dhab ah oo ka dhan ah sida uu sheegay Israel.
“Waxaan filaynaa in Lubnaan ay qaadi doonto tallaabo ay xididada ugu siibeyso ururada argagixisada ee ka hawlgala xuduudaheeda ee ka dhanka ah Israel.” Ayuu yiri Wasiirku.
Weerarkan ayaa lagu sheegay kiisii labaad ee Israel ka gaysato koonfurta Beirut, shan cisho gudahood. Xisbullah ayaa ku xoogan koonfurta Caasimadda Beirut.
Hoggaamiyaha Xisbullah, Naim Qassem ayaa mar sii horreysay ka digay in ururka uu ka sii dhammaanayo dulqaadka, ka gadaal markii uu Israel ku eedeeyay in ay sii waddo falalkeeda ay ku jebineyso heshiiskii xabad joojinta labada dhinac ee la gaaray daba-yaaqadii sanadkii hore.
Labada dhinac ayaa 27-kii bishii November ku heshiiyay xabad joojin lagu soo afjaray dagaaladii ay dadka faraha badan ku dhinteen.
Cabsida ugu weyn ee haatan jirta ayaa ah in uu dib u soo cusboonaado dagaalkii labada dhinac.
Dad badani ayaa ka cabsi qaba in uu mar kale isku dhac toos ah ka dhex qarxi karo Israel iyo Xisbullah, tani oo uga sii dareysa xiisadda haatan ka jirta Gobolka Bariga Dhexe.
Gobolka ayaa dib ugu laabtay xaaladdii kacsaneyd ee sanad iyo dheeraadba ka jirtay, ka dib markii Israel ay 18-kii bishii March ay dib u soo celisay weeraradii Gaza.
