Israel oo duqayn hor leh ka gaysatay koonfurta Magaalada Beirut

Diyaaradaha dagaalka Israel ayaa Talaadadii weerar ku qaaday bartilmaameed ku yaala koonfurta Magaalada Beirut ee xarunta dalkaasi Lubnaan.

Duqayntan ayaa lagu beegsaday dhisme la degan yahay oo ku yaala koonfurta Beirut, iyadoona uu burbur ka soo gaaray dhismahaasi iyo gaadiid hor yiilay.

Wakaaladda Wararka Lubnaan ee NNA ayaa ku warantay in laba gantaal lala helay saddexda dabaq ee ugu sarreya dhismahaasi.

Dadka deegaanka ayaa sheegay inaysan jirin wax digniin ah oo horey uga timid dhinaca Israel, qoysaskii ku noolaa dhismahaasina lagu khasbay in ay ka qaxaan.

Dowladda Lubnaan ayaa si adag u cambaareysay duqayntaasi, waxayna Wasaaradda Caafimaadka sheegtay in lagu dilay afar qof.

“Duqaynta ayaa waxaa ku dhintay afar qof oo ay ku jirto haweeney, waxaana ku dhaawacmay toddobo qof oo kale.” Ayay wasaaraddu ku sheegtay warsaxaafadeed ay soo saartay.

Taliska Militariga Israel ayaa sheegay in duqaynta lala beegsaday xubno ka tirsan Ururka Xisbullah oo Ururka Xamaas ee Falastiin ka caawiyay inay qorsheeyaan weerar ka dhan ah shacabka Israel.

Waa duqayntii labaad oo shan cisho gudahood ee Israel ka gaysato koonfurta Beirut, oo ay maamusho Xisbullah. Jimcihii la soo dhaafay ayay sidaan oo kale ay duqayn uga gaysatay koonfurta magaaladaasi.

Duqaymahan ayaa wiiqaya xabad joojinta jilicsan uu Mareykanku garwadeenka ka yahay ee lagu soo afjaray dagaaladii khasaaraha badan dhaliyay ee sanadkii hore.

Duqayntan ugu dambeysay ayaa ku soo aadeysa maalin uun ka dib, markii Hoggaamiyaha Xisbullah, Naim Qassem uu ka digay in ururka uu ka sii dhammaanayo dulqaadka, sababtu tahay Israel oo si joogta ah u jebineysa heshiiskii xabad joojinta labada dhinac ee ay gaareen 27-kii bishii November.