Ku dhawaad 60 askari oo ka tirsan ciidamada Congo oo maxkamad la soo taagay
Waxaa maanta laga furay maxkamad milatari oo ku taalla DRC, dacwad ka dhan ah lixdan askari oo ka tirsan ciidamada qalabka sida ee Jamhuuriyadda Dimuqraadiga ee Congo iyo labo dumar ah oo la shaqeynayay.
Eedeysanayaasha ayaa la horkeenay Maxkamadda Milliteriga ee Butembo oo ku taalla magaalladda Musiene ee Gobalka Waqooyiga Kivu.
“Eedeysanayaasha waxaa lagu eedeysay inay ka carareen cadowgooda, xatooyo, kufsi, baad iyo dambiyo kale oo ay ka geysteen xarumaha Lubero-Centre, Kimbulu iyo Musienene,” Seros Muyisa, oo ah wariye maxalli ah oo goobjoog ka ahaa dhageysiga dacwadda, ayaa sidaan BBC-da u sheegay.
Fallaagada M23 ayaa qabsatay dhul ku yaalla bariga DRC tan iyo markii uu billowday duullaanka xooggan bishii Janaayo.
Todobaadkii hore ayay galeen magaalada Bukavu oo ah magaalada labaad ee ugu weyn bariga dalkaasi, waxaana ay la wareegeen xafiiska gudoomiyaha gobolkaasi.
Kahor inta aysan Bukavu gacanta u galin fallaagada, ku dhawaad 80 askari oo Congo u dhashay iyo maleeshiyaad Zelando ayaa la xiray waxaana lagu xiray xabsiga magaalada iyagoo sugayay maxkamad.
Laakiin ka dib weerar ay qaadeen fallaagada M23, maxaabiis ku jirtay xabsiga Bukavu ayaa baxsaday, oo ay ku jiraan askar.
