Puntland oo sheegtay inay guullo ka gadheen dagaal ay ku qaadeen kooxda Daacish

Maamulka Puntland ayaa sheegay in ciidamadoodu guulo ka gaareen dagaal maanta ay ku qaadeen kooxda Daacish kaas oo ka dhacay dhacay buuraha Calmis-kaad ee gobolka Bari.

Sida uu xaqiijiyey wasiirka warfaafinta Puntland Maxamuud Caydiid Dirir, ciidamada ayuu sheegay inay kooxda ka qabsadeen dhowr furin oo ay ku lahaayeen buuraha Calmiskaad ka dib dagaal toosa oo maanta dhexmaray labada dhinac.

Wasiir Caydiid waxaa uu sheegay inay deegaano ka tirsan deegaanka Bali-dhidin ee maanta dagaalku ka dhacay ay ahaayeen halkii ay ku xooganaayeen kooxda Daacish ee uu hoggaamiyo Cabdiqaadir Muumin.

Puntland ma sheegin khasaaraha inta uu la’eg yahay dagaalka maanta ka dhacay deegaanka Bali-dhidin ee gobolkaas.

Maamulka Puntland ayaa dhawaan ku dhawaaqay dagaal ay ku qaadeen buuralayda Calmiskaad ee gobolka Bari halkaas oo ay ku sheegeen inay kooxda Daacish ku sugan yihiin.

Deegaanada ciidamada Puntland kula dagaalamayan kooxda Daacish ayaa ah deegaano qarfo ah oo buuralay ah.