Wasiirka Arimaha Gudaha Iyo Taliyayaasha Ciidamada oo Soo Saaray Go’aano Adag

Waxaa saaka ka qabsoomay Wasaaradda Arrimaha Gudaha shirka Amniga Qaranka, kaasoo uu shir Gudoomiyey Wasiirka Wasaaradda Arrimaha Gudaha JSL Maxamed Kaahin Axmed, ayna ka soo qayb-galeen Taliyayaasha guud ee Ciidamada qalabka sida.

Shirkan muhiimka ah ayaa lagu Lafa-guray amniga guud ee Dalka, u diyaar garowga Xilwareejinta labada Madaxweyne ee xilka isku wareejinaya 12 bishan iyo go’aamo adag oo laga soo saaray cidkasta oo nabadgelyada iyo wada jirka bulshada khatar ku ah.

Waxaana shirka ka soo baxay Qodobadan hoos ku qoran:

1- waxaa shirka la iskula qaatay in tallaabo sharciga waafaqsan laga qaado dadka ku baaqaya Arrimaha Nabadgalyo darro, sharcigana la horkeeno qofkasta oo ku kaca wax taabanaya Nabadgalyada guud ee Qaranka Jamhuuriyadda Somaliland.

2- In tallaabo sharciga waafaqsan laga qaado dadka ku hadlaya cayda, aflagaadooyinka lagu kala qaybinayo bushada, kuwaasoo abuuraya colaad iyo xumaan bulshada dhexdeeda ka dhacda.

3- Waa in Saxaafaddu ka fogaataa in ay baahiyaan hadalo xanaf leh oo dhaawacaya wada jirka bulshada iyo guud ahaanba Qarannimada jamhuuriyadda Somaliland.

4- Maanta laga bilaabo waxaa la joojiyey in Hoteelada iyo meelaha kale ee la isugu yimaaddo in lagu qabto shirar qabiilaysan, waxaana la farayaa Hotelada in ay ka digtoonaadaan shirarka qabilaysan, Hotel ka lagu qabto shirar noocaas ah Tallaabo ayaa laga qaadayaa.

5- waxaa shirka la iskula qaatay in la adkeeyo amniga guud ee Dalka, gaar ahaana amniga Magaalada Ceerigaabo ee Gobolka Sanaag.

6- shirka waxaa la iskula qaatay in la adkeeyo amniga Xuduudaha iyo Kaantaroolada, si loo xaqiijiyo amniga guud ee Dalka.