Dowladda Faransiiska oo dhacday kaddib marki ay weysay codka kalsoonida

Xildhibaanada baarlamaanka ku matala xisbiyada midigta-fog iyo bidixda-fog ayaa Arbacadi shalay ku midoobay diidmada codka kalsoonida ee xukuumadda Faransiiska, taas oo keentay in ay is casilaan Ra’iisul wasaare Michel Barnier iyo golagiisa wasiirrada.

Khilaafkan siyaasadeed oo ah mid sii qoto-dheeraanaya ayaa ku billowday muran dhanka miisaaniyadda ah, kaas oo ugu danbeynti keenay in marki ugu horreysay ay codka kalsoonida weyso xukumadda Faransiiska tan iyo sannadki 1962.

Golaha Sharci-dajinta Faransiiska ayaa mooshinka ka dhanka ahaa xukuumadda ku ansixiyay 331 cod, iyadoo marki hore loo baahnaa 288 cod.

Madaxweyne Emmanuel Macron ayaa ku adkeystay in uu xafiiska sii joogi doono ilaa uu ka dhameysanayo muddo xileedkiisa oo ku eg sannadka 2027-ka, hase yeeshee ku qasbanaan doono inuu soo magacaabo ra’isulwasaare cusub.

Macron ayaa lagu wadaa in uu khudbad u jeediyo shacabka Faransiiska caawa fiidkii. Waxaa la filayaa in uu si deg deg ah ugu dhawaaqo ra’iisul wasaare cusub.