Ukraine oo duqeymo khasaare badan dhaliyay ka fulisay Caasimadda Ruushka
Saacadihii hore ee maanta, Ukraine ayaa qaadday weerar ballaaran oo ay ku beegsatay caasimadda Ruushka, Moscow, iyo nawaaxigeeda, iyadoo la adeegsanayo illaa 70 diyaaradaha aan duuliyaha lahayn (drones), sida ay ku warameen mas’uuliyiinta Ruushka. Weerarkan ayaa sababay dhimashada hal qof iyo burbur baaxad leh oo gaaray dhisme rayid ah oo ku yaalla degmada Ramenskoye, oo 30 km u jirta xafiiska Madaxweyne Vladimir Putin ee Kremlin-ka.
Sida laga soo xigtay duqa magaalada Moscow, Andrei Vorobyov, diyaaradda aan duuliyaha lahayn ee keentay burburka iyo dhimashada ayaa la soo riday, taas oo keentay in ay ku dhacdo dhismahaas rayidka ah.
Weerarkan ayaa muujinaya kororka awoodda militariga Ukraine iyo horumarinta tiknoolajiyadeeda diyaaradaha aan duuliyaha lahayn, taas oo qeyb ka ah dadaallada dalkaasi uu ku wiiqayo awoodda Ruushka ee gudaha. Ukraine ayaa si joogto ah uga codsanaysa reer Galbeedka in loo oggolaado inay helaan gantaallada riddada dheer, kuwaas oo ay ku gaari karaan bartilmaameedyada muhiimka ah ee ku yaalla gudaha Moscow iyo kaabayaasha muhiimka ah ee Ruushka. Haddii dalabkan la fuliyo, waxaa laga yaabaa in weerarradu ka sii daraan, taas oo sare u qaadi karta xiisadda dagaalka.
Weerarkan Moscow ka dhacay ayaa sidoo kale u muuqda calaamad xun oo muujinaysa in Ruushku uu wajahayo weerarro aan horay loo filayn oo si gaar ah u beegsanaya gudaha dalalkaasi, oo ay ku jiraan goobaha rayidka ah ee caasimadda. Taasi waxay la micno tahay in difaacyadii caanka ahaa ee Ruushka ay ku guul darreysteen inay si buuxda uga hortagaan weerarradan cusub ee drones-ka. Inkasta oo nidaamka difaaca cirka ee Moscow uu guulo ka gaaray soo rididda qaar ka mid ah diyaaradahaas, haddana burburka ka dhashay weerarkan ayaa muujinaya nuglaanta sii kordhaysa ee magaalada.
