Haweenay Markii Ugu Horraysay Taariikhda Somaaliya Ka Noqotay Kusime Madaxweyne

Hadal Hayn Ka Taagan Gabadh Markii Ugu Horraysay Taariikhda Somaaliya Ka Noqotay Kusime Madaxweyne

Xildhibaan Sacdiya Yaasiin Xaaji Samatar oo ka tirsan Baarlamanka dalka Soomaaliya ayaa noqotay haweeneydii ugu horreysay taariikhda dalkaasi ee ku sime Madaxweyne ka noqota Soomaaliya, kadib markii uu shalay dalka Imaaraadka u baxay Madaxweyne Xasan Sheekh Maxamuud oo dhawaan xilkaasi loo doortay.

Sacdiya ayaa ah guddoomiye ku xigeenka koowaad ee Golaha Shacabka, waxayna fursadaan heshay, kadib markii uu isna shalay u baxay safar dibadeed Aadan Madoobe. Sida uu dhigayo dastuurka KMG ah ee Soomaaliya, xildhibaan Sacdiya ayaa dalka ka talineysa inta uu mid kood soo laabanayo Madaxweyne Xasan, ama Aadan Madoobe. Haweeneydaan ayaa baarlamaanka kasoo gashay Puntland, waxayna horey u noqotay haweeneydii u horreeyey ee ku guuleysatay ku xigeenka 1-aad ee Golaha Shacabka.
Arrintan ayaa dhalisay hadal heyn xoogan, waxaana isla markiiba sawirrada Sacdiya lagu baahiyey baraha bulshada ay ku wada xidhiidho, iyada oo aad loo hadal hayo arrintan.
Haddaba sidee looga falceliyey?

“Waa markii ugu horreysay ay gabar ku sime Madaxweyne Dalka ka noqoto soo dhawaada hablaheena” ayuu yidhi Cabdirsaaq Xirsi Xaashi. “Halkaas waxaa laga dheehan karaa in aan madaxweyne noqon karno, bal may inoo quuraan hal mar, si xasaanad leh madaxweyne ku noqo,” ayey tidhi Aamina Daahir Saciid. “Soo dhawaaw Ku Simaha Madaxweynaha Jamhuuriyadda Federaalka Soomaliya Hambalyo Hablaha Soomaaliyeed,” ayuu isna yiri Cabduqaadir Maxamed. “Sharaf ayey inoo tahay hambalyo dhamaan dumarka Soomaaliyeed,” ayey tidhi Najmo Cilmi oo ka mid ah dadka ka falcelinayey arrintan oo hadal heynta ka dhalisay baraha bulshada.