Qarax lala beegsaday Wafdiga Madaxweynaha Puntland ee Boosaaso
Warar kasoo baxaya qarax maanta Boosaaso lagula beegsaday kolonyo la socotay Madaxweynaha Puntland Siciid Cabdullaahi Deni oo gaadhay Boosaaso.
Wararku waxay sheegayaan in qaraxa oo ka dhacay nawaaxiga kantaroolkii hore ee Boosaaso uu sababay khasaare dhimasho iyo dhaawac leh.
Qaraxa oo sida la sheegay ahaa miina dhulka ku aasnayd waxa ku geeriyooday laba askari halka afar kalena ku dhaawacmeen.
Qaraxa oo jugtiisa laga maqlay meelo kamid ah Magaalada Boosaaso ayaa qabsaday Gaari kamid ah kuwa la socday Wafdiga Madaxweynaha Puntland, xilli ay marayeen aga-gaarka Ex-Kaantarool oo ah afaafka hore Magaalada Boosaaso, waxaana ku dhintay laba Askari Afar kalena waa ay ku dhaawacmeen.
Goobjoogayaal ayaa waxaa ay sheegeen in qaar kamid ah Ciidamada la socday wafdiga Madaxweynaha Puntland ay fureen rasaas farabadan taas oo aan weli la xaqiijin khasaaraha ka dhashay.
Madaxweynaha Puntland Saciid Cabdullaahi Deni ayaa inta uu tegin Boosaaso safar dhinaca dhulka ah uga ambabaxay Magaalada Carmo ee Gobolka Bari, waxaana halkaasi u tegay arrimo la xiriira doorashooyinka Golaha Shacabka.
Kooxda Al-shabaab ayaa markiiba sheegatay mas’uuliyadda qaraxaas oo ah kii ugu horreeyay ee taariikhda Puntland lala beegsado kolonyo madaxweynaha la socota.
