Miyaan La Ila Arag
- Markii aan doorashada u ordayey! Ninka sidaasi u hadlayaa, wuxu macno toos ah ka qaatay oo uu Soomaali u turjumey, qurub weedheedka (phrase)ka Ingiriisiga ah ee (running for)!!
Afsoomaaliga saxda ah ee awel la adeegsan jirey wuxuu ahaa/yahayna, markii aan u tartamayey ama loolamayey doorashada ama xilka!
-
Ereyga kale ee la silic dileyna waa: Xabbad nool!? Ereygaasi, waxa 1980 naadkii markii taariikhda ugu horreysey isticmaalay; nin reer magaal ahaa oo ka shaqayn jirey laanta Afsoomaaliga ee BBC da. Ninkaasi warka akhri jirey, ayaa si toos ah u macnaystay, ereyada Ingiriisiga ah ee (live bullet).
Afsoomaaliga saxda ah ee (live bullet) loo isticmaali jireyna wuxu ahaa, xabbad dhab ah. Waayo, xabbaduhu laba nooc ayay u kala baxaan oo kala ah, tu dhab ah iyo mid loo yaqaanno, dheemish ama ta rabadhka ah.
- Waxa kale oo aan dhawaan arkayey, nin ay ku qalloocatay kalmadda, dabuub oo inta badan laga isticmaalo: Jabuuti, gobolada Galbeedka ee Somaliland iyo Kililka Shanaad. Mudanahaasi oo dhawaan meel fagaare ah dhallinyaro kula hadlayey, wuxu dhageystayaasha ka dhaadhicinayey; dabuub ayaa soo helay, isagoo ereyga dabuub ku macnaynaya; (statement)!
Haddaba, haddii aan la foofdaran habaabineyn, ereygan dabuubi wuxu la macnayey, kelmad ama erey ee ma aha (statement)!
Tusaale ahaan: haddii uu qof kugu yidhaahdo, dabuub xun baad maanta igu tidhi, macnaheedu waa, erey xun baad igu tidhi.
Afkii wuu ooyayaa
Ilmuu sii deynayaa
Agoon weeyaan haddeer
Rag baa ereygii bedeley
Afkii baa juuqda gabay
Abwaankii waa la nacay
Odaygii wuu aamusoo
Ishuun buu gabedh ka siin
Ayey waa laga tegee
Miyaan ummaddiiba jirin
Sideen ubadkii nidhaa?
Miyaan af qalaad barnaa?
Haddii ereygeennii lumo
Islaamkii yaa macnayn?
Ayaa aayadihii furfuri?
Ayaan sii eersannaa???
Cabdullaahi Maxamed Cumar
Email: timacadde56@hotmail.com
