Laba Qoys Oo Isku Haystay Nin 63 Jir Ah Oo Lakala Saaray
Garoowe(OWN)- Maamulka Puntland ayaa maanta si rasmiya u shaacisay Natiijada ka soo baxday baadhitaan ku saabsan Hidda-sidaha DNA (Deoxyribonucleic acid), oo lagu sameeyay nin da’diisu tahay 63-sano jir, kaas oo laba Qoys ku muransanaayeen.
Shaacinta Natiijada ka hor, ku xigeenka Xeer Ilaaliyaha guud ee Maamulka Puntland Maxamed Xareed Faarax ayaa labada Qoys u bandhigay in ay aqbali doonaan Natiijada soo baxda, taas oo ay ballan-qaadeen.
Guddoomiyaha hay’adda Forensic science-ka ee Puntland Cabdirashiid Maxamed Shire oo gacanta ku hayay kiiska baadhitaanka, ayaa shaaciyay labada Qoys midka uu la hiddo noqday ninka lagu muransanaa.
Labada Qoys midkood, oo uu wakiil ka-ahaa Cabdirisaaq Siciid Ismaaciil, ayuu la hidde nodqay ninkii lagu muransanaa, kadib markii la mariyay baadhitaanka cilmiyaysan Forensic-ga.
Qoyska labaad, oo iyagana uu wakiil ka-ahaa Cali Axmed Aaden, islamarkaana sheeganayay ninkan magaciisa la qariyay, ayay isku hidde-noqon waayeen, sida ka soo baxday Natiijada.
