Amiirka Qatar Oo Aan ka Qeyb-galeyn Shirka Khaliijka Ee Maanta ka Furmaya Sacuudiga.

Amiirka dalka Qatar Sheikh Tamim bin Hamad Al-Thani kama qeyb-gali doono Shir Madaxeedka Khaliijka ee manta ka furmay magaalada Riyadh Ee Xarunta Boqortooyada Sucuudiga, waxaa sidaas werisay warbaahinta dowladda, taasi oo wiiqday rajadii laga qabay in la Helo  dib u heshiin dhex marta Doha iyo isbahaysiga Riyadh ay hogaamiso.

Sacuudi Carabiya, Imaaraatka Carabta, Baxrayn iyo Masar ayaa dhammaantood Xidhiidhkii diblomaasiyadeed iyo kii socdaal-ba U gooyey Qatar bishii June ee 2017, sababo la Xidhiidha  Eedeymo ku saabsan inay Taageerto Argagixisada, islamarkaana Xidhiidh  la leedahay dalka Sacuudiga ay Xifaaltamaan ee Iran, balse Qatar ayaa si kulul u beenisay eedeymahaasi.-ba

Amiir Tamim ayaa Ra’iisul wasaaraha dalkiisa Abdullah bin Nasser bin Khalifa Al-Thani u Magacaabay inuu Hoggaamiyo Ergo ka socota Qatar oo ka qeyb-galaysa shir madaxeedka maanta furmay ee Golaha Iskaashiga Khaliijka, sida ay werisay wakaaladda wararka QNA.

Rajada dib u heshiin dhex marta labada dhinac ayaa soo muuqanaysay dhowaanahan inkasta oo Doha ay diiday inay aqbasho shuruudaha ay ku xidheen dalalka Xidhiidhka u jaray.

Kadib markii boqorka Sacuudia Salman uu Amiir Tamim ku casuumay kulanka, wasiirka arrimaha dibedda Qatar ayaa sheegay in “xooga horumar ah” laga sameeyey wada-hadallo ay la leeyihiin Riyadh.

Tallaabo ay qaadeen daqiiqaddii ugu dambeysay ayaa sidoo kale saddexda dal ee Khaliijka waxay ku aqbaleen inay ka qeyb-galaan tartanka kubadda cagta Khaliijka ee lagu qabtay Qatar, taasi oo hogaamisay hadal hayn ku saabsan in xal diblomaasiyadeed uu dhow yahay.

Qaar ka mid ah taxliiliyayaasha siyaasadda ayaa rumeysnaa in shirka Khaliijka ee Riyadh uu dhabbaha u xaar lahaa “shir dib u heshiisiin.”