Maxaa Ka Jira In Faysal Cali Waraabe Iyo Madaxweyne Farmaajo Ku Kulmayaan Brusells ?

Brussels (OWN)-  Hoggaamiyaha xisbiga mucaaradka ah ee UCID  Faysal Cali Waraabe ayaa maanta kulan la yeelanaya madaxweynaha Soomaaliya Maxamed Cabdillaahi Farmaajo hase ahaatee lama oga ajandaha kulanka labada masuul. Eng Faysal ayaa maalmihii u dambeeyay ku sugna magaalada Brusells ee shirku uga socdo Soomaaliya.

Gudoomiye Faysal oo ka jawaabayay dhalliil loo jeediyay sawirro uu la galay danjiraha Soomaaliya u qaabilsan Midawga Yurub wuxuu sheegay in ay tahay in madaxdu kulanto iyaga oo ku kala duwan fikradaha Somaliland iyo Soomaaliya.

Faysal oo ay isku dhaw yihiin xukumadda madaxweyne Muuse Biixi Cabdi lama oga in uu Farmaajo gaadhsiin doono farriin uu ka sido madaxweynaha iyo in uu arrimo u gaar ah kala hadli doono laakiin, waxa lagu xasuusta fikradihiisa xagjirka ah ee ku saabsan in uu ku doodo in uu taaggan lahaa cidda Somaliland ah ee Soomaaliya tagta ama taageerta.

Faysal Cali Waraabe  Iyo Danjiraha Soomaaliya u qaabilsan Midawga Yurub