Dawlada Federaalka ah ee Somalia oo ku Hungowday Deeqdii ay Sheegtay in Dawlada Imaaraatku ku Caawisay

Muqdisho (OWN) – Oodwaynemedia  ayaa xog ka heshay wixii ay siday diyaaradii ay soo dirtay dowladda Imaaraadka ee shalay kasoo degtay garoonka Aadan Cadde ee magaalada Muqdisho, taas oo dowladda Soomaaliya ay sheegtay in ay keentay deeq caafimaad oo uga timid Imaaraadka Carabta.

Diyaaradda ayaa siday  23 tan oo lagu sheegay Agab caafimaad oo Lagaga hor-tegayo  cudurka Coronavirus.

Hase yeeshee, xubno ka tirsan Wasaaradda arrimaha dibadda Soomaaliya iyo tan caafimaadka ayaa Caasimada Oodwaynemedia u sheegay in markii la furay baakadaha laga waayey wax dawo ama qalab kale oo caafimaad ah, balse ay siday oo kaliya Saabuunta gacmaha lagu maydho.

Arrintan ayaa la sheegay inay ka yaabisay mas’uuliyiinta dowladda federaalka ah.

Saraakiisha noo warantay ee ka tirsan wasaaradda arrimaha dibadda Soomaaliya waxa ay sheegeen, xataa in aysan xaqiijin karin in Saabuunta Imaaraadku ugu deeqay Soomaaliya ay tahay mid dili karta fayruska korona, si la mid ah alkolada.

Caadiyaan saabuunta gacmaha ayaa Loo Adeegsadaa kaliyaa Nadaafadda, waxaana badanaa la dhigaa musqulaha, mana cadda in midda Imaaraadka ay ka duwan tahay maadaama aan weli la tijaabin.

Arrintan ayaa aad uga yaabisay mas’uuliyiinta dowladda Soomaaliya oo iyagu markii hore sheegay in dowladda Imaaraadka ay kala wareegeen deeq caafimaad oo iskugu jirta dawooyin iyo qalab kale oo lagula tacaalo cudurka Coronavirus.

Wasaaradda arrimaha dibadda Soomaaliya ayaa Shalay galabtii  dowladda Imaatadka Carabta ugu mahad celisay deeqdaas, waxaana lagu sheegay qoraal kasoo baxay Wasaaradda in dowladda Soomaaliya ay kaalmadaas caafimaad u aragto hadiyad muujinaysa heerka wanaagsan ee Xidhiidhka u dhexeeya labada dal.

“Soomaaliya waxa ay uga mahad celinaysaa Imaaraatka kaalmadooda caafimaad, waxa ayna u aragtaa haddiyad muujinaysa heerka wanaagsan ee Xidhiidhka u dhexeeya labada dal iyo labada shacab ee walaalaha ah,” ayaa lagu yiri qoraalka wasaaradda arrimaha dibadda Soomaaliya.

Xidhiidhka Soomaaliya iyo Imaaraadka ayaan caga badan ku taagneyn tan iyo horraantii sanadkii 2018-kii, waxuuna gargaarkaan noqonayaa kii ugu horeeyey ee Imaaraadku kasoo dejiyo Muqdisho, intii uu jiray madmadowga siyaasadeed ee xukuumadaha Muqdisho iyo Dubai.