Kenya oo Gubtay Kalluun Looga soo dhoofiyay Dalka Somalia
Nairobi (OWN) – Ciidamada ammaanka ee dalka Kenya ayaa gacanta ku dhigay, islamarkaana gubay shixnad Kalluun ah oo iib ahaan looga qaaday Soomaaliya.
Kalluunkaan oo ka koobnaa illaa 12 tone ayey laamaha amniga Kenya waxa ay shaaciyeen in si sharci darro ah looga soo safriyey magaalooyinka Muqdisho iyo Kismaayo ee Soomaaliya, islamnarkaana lagu qabtay gobolka xeebta ee Lamu.
Sidoo kale Kenya ayaa sheegtay kalluunkaan oo ku jiray 761 kiish lagu qiimeeyey lacag dhan Sh5 million oo ah lacagta Kenya ah.
Hay’adaha amniga ayaa sidoo kale sheegay in gacanta lagu dhigay illaa 7 ruux oo waday Kalluunkaasi, kuwaas oo dhowaan la soo taagi doono maxkamad.
Arrintaan ayaa ku soo aadeysa, iyadoo dowladda Soomaaliya ay joojisay Qaadkii fara badnaa ee maalin weliba laga keeni jiray dalka Kenya, sabao la xariira Coronavirus.
